Årets julegåver del 1

Kalenderluke 4

Yei! Eg vart dagens følger i adventskalenderen til that`s just so cute. Kjekt med litt oppmerksomhet! Her er eit av julekorta eg har laga nyleg. Syns motivet av dei tre vise menn var så fint :) Ha ein god 4. desember alle saman! Eg nyt lesesalens ro for å gjere unna to av eksamensoppgåvene mine, før det vert julebord i kveld!

1. søndag i advent

Årets adventsdekorasjon vart enklare enn i fjor, men eg er likevel nøgd.. :) No er heimen rydda. Stjerna eg laga i fjor er kome opp i vindauget, julekrubba frå Willow tree er sett opp og dei lilla dukane er lagt på. Eg pyntar med lilla for å halde meg til kyrkjeåret sine fargar. Idag har vi gått inn i det nye kyrkjeåret og fargen på tekstilane i kyrkja er lilla no. Så det er det det går i her i huset.. No skal eg strikke og hekle litt, og så ventar adventskonsert i kveld før nattevakt. Det er deilig å tenke på at det går mot jul, eksamens- og jobbfri. Det vert godt! Ha ein flott 1. søndag i advent du og.. PS: det går dårleg med kortutfordringane til no. Utruleg kor mange flinke damer det er der ute :) Hehe..

Vintageutfordring

Kva ein les på lesesalen kan vere så mangt. Og akkurat no var eg på ei bloggrunde, og kom på at eg hadde eit bidrag å poste som eg har laga til Scrappiness si utfordring. Temaet var ein vintageinspirert julekreasjon. I mitt tilfelle vert dette eit vintageinspirert julekort.


Småbileta er frå Kaiser Craft "Tis' is the season". Snøkrystallarket som er brukt til bakgrunn er restar frå bryllaupsalbumen. Notepapiret er frå loppemarknad. Har brukt cracklepaint for å få ein litt betre kontrast. Har sydd fast blonden med vokstråd. Snøkrystallar frå Martha Stewart sin puncher. Og nokre metallsnøkrystallbrads har eg også fått med. Ei kjekk utfordring!

Inspirasjon

Eg har hatt mykje inspirasjon i julekortlaginga i år som de ser nedover bloggen. Kjekt med så mange utfordringar som kan gje gode tips og idear til oppsett. Nordsalten hobbyklubb har ei utfordring der ein skal verte inspirert av eit bilete. Og det vart eg i aller høgste grad. Eg skulle verte inspirert av eit bilete og her er mi løysing..


Både biletet eg har valt og englen i ramma er valt på grunn av inspirasjonbiletet. Arka er frå Webster Pages og nokre andre produsentar eg ikkje har i hovudet her og no. Best Wishes-band frå Martha Stewart, og snøkrystallar frå same dama. Har sydd i hjørna med voksa bomullstråd. Og så har ein liten heklaserviett fått vere med på laget og.

Rosa, blått og lilla

Sukkersøtt har og ei utfordring på gang. Her skal ein lage eit kort med fargane rosa, blå og lilla. På juleverkstaden i går tok eg utfordringa og prøvde å lage eit kort i litt andre fargar enn det eg brukar, og slik vart resultatet.

Blomane og kartongen er i rosatonar. Snøkrystallen er i blått. Og om du ser godt etter har jenta på biletet ein lilla kjole på seg :)

Arka er frå Webster Pages. Snøkrystallar og blondekant er det puncherane til Martha Stewart som har hjelpt meg å lage. Blondane står mamma for. Blomane er frå gamle lysmansjettar med metallpynt frå perlehuset.

Kjekk utfordring å lage kort i andre fargar enn det ein vanlegvis gjer.

Ventetid

Scrappekammeret har og ei utfordring gåande som eg har laga eit julekort til. Temaet er ventetid og då syntes eg at det passa godt med eit kort til julenissen..

Papira eg har nytta her er ein god kombinasjon av Webster Pages, Kaiser Craft og nokre papir som eg kjøpte i USA i sommar som eg ikkje hugsar produsenten av. Elles har nokre små heklabrikker fått nytt bruksområde. Blomen er i utgangspunktet frå prima, men har fått ny topp av papir, resten av heklabrikken og litt bling. Bandet er frå ei julegåve i fjor, så her snakkar vi gjenbruk. Biletet av julenissen er frå eit klippeark kjøpt på panduro.

Raudt og kvitt

Fleire utfordringar står for tur, og denne gongen slår eg likegodt til med to bidrag til Sketchy Colors si utfordring nr. 48. Fargane til utfordringa er raudt og kvitt, og her er mine to bidrag.


Eg har brukt ark frå Webster pages og Kaiser Craft "Tis' the season", ein heimelaga blome og kakedoilies, litt band og metallpynt frå perlehuset.

Her har eg brukt ark frå Kaiser Craft "Tis' the season", notepapir frå loppemarknad, heimelaga blomar frå gamle lysmansjettar og blondar frå ho mor.

Ei julehelsing

I dag har eg hatt juleverkstad med to kjekke jenter frå klassa. Eit nytt innlegg frå den kjekke kvelden kjem seinare. Aller først må eg nemleg rekke å poste ei julehelsing som skal vere med i kreative krumspring si utfordring denne veka. Kortet over er mitt bidrag til utfordringa. Det er i 6x6, med papir frå webster pages, vintagefoto frå panduro, eigenproduserte noteblomar og litt blondepynt. Eg har laga fleire kort og i kveld, og det vert nok posta nokre fleire i dagane som kjem. Ha ei god natt!

Barnedåpshelg

Eg har vore i barnedåp som fadder til Eva Camilla i helga. Kortet til dåpsbarnet vart laga som små sko etter ein mal eg fann på kreativesider.no. Eg var og med på å pynte bordet :) Syns mamma Lina har gjort ein særdeles god innsats i planlegginga og førebuingane! Kjekk helg!


PS: skoa er med i ei utfordring på that's just so cute..

Oppussing

Hausten går fort og det er mange prosjekt som står i kø. Eit av dei er denne tallerkenhylla som eg kjøpte på loppemarknad for ca ein månad sidan. Den var beisa i ein slags mørkebrun farge. Har pussa den ned, og idag har eg grunna første strøket. Gløymte å ta bilete av den før eg starta, men her er i alle høve eit bilete av undervegsprosessen. Gler meg til å verte ferdig, slik at eg kan henge den opp over kaffitraktarane våre! :)

Velkomen!

Endeleg kan eg legge ut bilete av fødselsdagsgåvene til dei to nye verdsborgarane som har kome i løpet av dei tre siste dagane! Filip August og Eva Camilla har vore venta på i lengre tid, og endeleg har dei kome til verda! Gratulerer mødrer, fedrer og storesøster!

I går fekk eg vitje vesle Filip August på sjukehuset, og han fekk si lille blå fødselsdagsboks full av små kjekke ting å gi vekk!


Eva Camilla kom til verda idag, og sjøv om ikkje ho enno har fått si boks, reknar eg med at verken ho, mor eller far er særs ivrige blogglesarar dei næraste dagane! Difor trur eg det skal vere trygt å leggje den ut litt på forhånd!


For dei litt meir scrappeinteresserte så er boksene laga etter mal frå ei Happy Meal-boks frå MacDonalds. Ein god idé som eg vart inspirert til på ei av mine bloggrunder. Eg har nytta ark frå Webster Pages, bazills, elles litt sløyfer, bokstavar, utstansa sommerfuglar og nokke anna småpjask. Hausten er i gang, og dermed og scrappesesongen! Eg hiv meg med på utfordringa frå Nordsalten Hobbyklubb som var å lage noko med vingar. Vingane finn du på den søte feen som rir på skilpadda, og på sommerfuglane på sidene til boksa.

Det er kjekt med nye verdsborgarar!

Loddtrekking

Då er trekkinga av giveawayen gjennomført. Samanlagt vart det tatt 24 lodd medrekna kommentarar og følgjarar. Eg har brukt ein digital loddtrekjar, som heilt tilfeldig trakk ut eit nummer mellom 1 og 24.. Og det vart nr. 15.

Og kven vart så den heldige vinnaren? Jau, det vart..

tamtaramtamtam..

Anja - som fekk nr. 15 tilfeldig tildelt av meg!

Hurra for deg! :) Du får dette settet i premie!! Og det er vel fare for at vi snakkast i Trondheim til hausten, så då kan du få det ved eit passande høve! :)


Forhåpentlegvis vert produksjonen sett i gang att når ferien er over, så fram til då er det berre å gjere på noko anna enn å kike innom sida mi :) God ferie til de som framleis har litt att!

Utsetjing

Vert visst utan internett i nokre dagar, så då vert trekkinga av giveawayen utsett til litt ut i neste veke.. Då har de nokre dagar til på dokke om de vil vere med, men har gløymt å ta lodd. Berre sjå innlegget litt lenger nede på sida :)

Scrapbook heaven

No er det lenge sidan sist eg var innom og blogga her.. Det vert lite produksjon på meg for tida ddå eg er i USA. I staden for sørgjer eg for å gjere innkjøp slik at eg kan fortsette produksjonen når eg kjem heim.

Var på to ulike scrapbookbutikkar i går, og begge gjekk Panduro og andre norske scrapbookbutikkar ein høg gang. Her er alt så stort! Og hurra for det! Fekk kjøpt masse fint.


Blant anna:
- blomar frå Prima
- ulike silkeband
- fire puncherar frå Martha Stewart
- dymotape i kvit, rosa og lyseblå
- ulike alfabet
- eyelets
- 36 nye pennar!
- diverse ark
- rubons
- ein del pappklistremerker frå byane vi har vore i og skal til
- og sist, men ikkje minst, nytt skjærebrett frå fiskars. Det gamle hadde starta å kutte skeivt.

No gler eg meg til ein ny scrappehaust!

PS: Minnar om giveawayen i førre innlegg!

Giveaway

Eg tenkte eg måtte feire litt at eg skal på sommerferie.. Det førar jo til at det vert dårleg med oppdateringar her på ei stund. Difor tenkte eg at eg kunne ha ein liten giveaway til de som ikkje får vere med meg på utsatt bryllaupsreise!

I tillegg er det jo så mange kjekke folk som er innom og kommenterar på bloggen min! Tusen hjarteleg takk for alle dei kjekke orda de skriv. Og så er det litt kjekt å sjå at det er folk frå heile landet som er innom. Det veit eg fordi eg brukar google analytics til å følgje med på statistikken på sida. Så no har du sjansen til å legge igjen ein kommentar og kanskje få noko att for det!!

Og korleis fungerar så giveawayen..

Du får 1 lodd for å kommentere dette innlegget.
2 lodd kan verte dine dersom du vert følgjar av bloggen min.
Og 3 lodd får du dersom du lenkjer til bloggen min med biletet som er brukt i innlegget.
Skriv i ein kommentar kor mange lodd du tek!

Vinnaren trekk eg 1. august. Så her har de lang tid på dykk :)

Og kva gir eg vekk? Jo, ein liten sminkepung og ei lita lommebok akkurat med nok plass til nokre få kort og litt myntar..


GOD SOMMAR TIL ALLE LESARANE MINE!!

PS: Om du har lyst, kan du følgje oss på ferietur på fordidetervito.

Betre seint enn aldri

Jammen meg det rakk eg ein bloggpost før klokka vart over midnatt..

Nye puter i sofaen har vore eit lenge påtenkt prosjekt. Og i dag vart det realisert! Hurra for det! Ein tur til Stoff og stil gjorde utslaget. Det var kome eit nytt stoff som passa så godt til gardinene våre! Og det brune stoffet passa godt til sofaen i seg sjølv. Og så vart det nok stoff til ei lita brikke på stovebordet og. Putene har trykknapp i botnen så det er lett å ta av trekket for å vaske det om det skulle verte naudsynt. Så idag har eg lært korleis ein slår i trykknappar og! No ventar ryddinga.. God natt!

Rydding av klesskap

Har rydda klesskapet i dag. Det var på tide.. Sidan vi snart reiser på ferie og har planar om å kjøpe nye klede då, måtte det ryddast litt plass, samt pønskast ut kva nye klede eg har aller mest lyst på. Eg kom over ein sommartopp som var så sliten i strikken at den godt kunne brukast til noko heilt anna. Den vart til ein babykjole, eller ein liten babytopp fritt etter denne oppskrifta. Har framleis litt stoff att, så kanskje vert det ein til?


I morgon må eg på Stoff og stil og kjøpe fleire glidelåsar. Det var jo kjempekjekt å lage sånne små vesker og lommebøker!

To innlegg på ein dag?

At eg skriv to innlegg på ein dag seier vel noko om kor kjekt eg har det nett no med syinga. Eg sit på stua med utslått kjøkkenbord, og Hans Jakob sit i stolen og ser fotball-VM. Snakk om kjekk kvalitetstid!

Lovte jo i går kveld å vise fram det eg sydde på i går. I dag er dei siste kleda heilt ferdige. Eg har sydd ein kjole og ein buksedress etter mønster fra "Barnetøy du selv kan sy 0-4 år" av Elsebeth Gynther. Artig å finne att diverse mønster som eg kjenner att frå eg sjølv var lita. Og stor var gleda då eg fann ut at maskina mi kan sy i knappar! :) Det sparar veldig mykje tid.


Eg har og sydd ei smekke eller eit halstørkle av ei strimle hjertestoff som eg hadde i ei boks. (Den er til deg Lina!) Og til slutt har eg endeleg fått sydd "reiselommebok" og "reiselitavesketilåhamobilogandresmåtingi". Eg har grudd meg skikkeleg til å sy desse to fordi eg aldri hadde sydd i glidelås før. Men etter litt prøving og feiling og opprekking av saumar fekk eg det til på to ulike måtar. Litt digg var det at eg sydde desse to av nokre små brikker eg kjøpte på loppemarknaden, dei var nemleg ferdig fora! Genialt! Nokre små hjerter har eg og på lager, og neste prosjekt med desse får de sikkert sjå i morgon!

Kleshengarar og tutorial

I går kveld på nattevakt fekk eg ein god idé..
Kleshengarane mine er for store for barnekleda, så kvifor ikkje lage eigne passande barnekleshengarar sjølv?

Tenkte eg kunne forklare steg for steg korleis eg laga dei, så kanskje du får lyst til å lage kleshengarar sjølv?

Først måtte eg på Clas Ohlson for å kjøpe ståltråd. Kjøpte ein som er 1,5 mm tjukk. Den er passe stiv til å henge noko på, men samstundes ikkje så stiv at eg ikkje klarar å bøye den med handemakt. Og i posen var det tre rullar, ein rull rakk til tretten hengarar.

Deretter bar det heim, og eg måtte rote litt i ei av hobbyeskene mine under senga etter treperlene mine. Dei såg eg for meg at kunne passe bra som pynt. Klipte opp ståltråden med ei avbitartang i stykke på litt over ein meter. Sjølve hengaren er ca 30 cm brei. For å få til dei runde endane bøyde eg ståltråden rundt metallrøret på støvsugeren, då vart kleshengeren passeleg avrunda. Tvinna ståltråden på toppen etter å ha forma til ei passeleg form, tredde på perler på endane, forma eit hjerte, tvinna igjen og klipte av endane med ei avbitartang.

Desse kleshengarane er alt for fine til å henge inni skapet, difor brydde eg meg ikkje med å lage krok til å henge over ei stang. I staden for kan ein spikre ein spiker i veggen og la kleshengeren henge framme med favorittplagget på!

Etter å ha laga ti perlekleshengarar kom eg på at eg hadde litt kvite gjennomsiktige stoffrestar igjen frå ei av gardinene frå loppemarknaden eg var på førre helg. På dei siste tre kleshengarane tvinna eg stoffstrimler rundt ståltråden før eg bøyde den. For å få stoffstrimlene til å sitte fast tvinna eg tynnare ståltråd rundt og rundt.

No vert det enda kjekkare å sy fine ting, når dei kan henge på eigenproduserte hengarar!
Håper du prøver!

Selge det eg syr?

I dag har eg ingen ferdige produkt å vise til. Fordi dei ikkje er heilt ferdige, og fordi eg har plundra mykje med tankane om kor kjekt det er å sy, og at eg har lyst å sy meir. Og at eg har lyst å selge det eg syr og tene pengar på hobbyen min. Det er målet :) Det skal eg frå hausten av. Då vert mine barneklede å finne både på nettet, og i ein liten liten butikk. Eg har til og med funne navn. Men det er hemmeleg enno..

Så no må eg lage nye merkelappar.. Trur jammen meg det eg skal bestille frå denne sida. Dei førre vart nemleg ikkje nokon kjempesuksess, fordi teksten gjekk av i vask endå at eg hadde brukt strykejernet på dei slik som det stod på tekstilmalingsboksen.. Jaja. Det var no kjekt å lage merkelappane i alle høve.

Bilete av det eg har sydd i dag kjem nok høgst truleg i morgon.

Frå putevar til sommerkjole

Inspirasjonen er framleis vedvarande! Hurra for det! Har sydd to barnesommarkjolar etter denne oppskrifta her. Bloggen hennar er absolutt verdt eit besøk for deg som likar søm, fargen kvit og koselege ord!

Men det var kjolane.. Oppskrifta var ganske lett å følgje, og ein treng heller ikkje så mykje stoff. Difor vart eit av putevara frå loppemarknaden ofra, syns det passa heilt utmerka til sommarkjole. Og det kjekke var jo at eg fekk to kjolar av eit putevar. Det kallar eg bonus! No skal eg ut i marka å orientere litt. Gler meg!

Forklekjolar. Gårsdagens prosjekt.

Sidan eg er i symodus for tida reisar eg rundt på mange ulike bloggar etter inspirasjon. Hos denne dama, fant eg noko eg fekk så lyst til å sy. Forklekjolar er veldig søtt på små ungar tykkjer eg. Og eg reknar med at dei skal få bein å gå på etterkvart som søstre, svigersøstre, venninner og eg set i gang produksjonen av små søte jenter..

På grunn av at eg ikkje hadde noko mønster til desse forklekjolane vart gårsdagens prosjekt av typen langvarig. Først prøvde eg å lage mønster sjølv. Deretter innsåg eg at eg ikkje fekk det til. Så reiste eg opp på skulen for å skrive ut og forstørre mønsteret frå Helene på kopimaskina. Og då eg kom heimatt kunne eg endeleg prøve meg fram med å klippe til mønster.


Sidan eg ikkje har ein baby tilgjengeleg måtte Substi trø til som prøvedukke. Han har vel kanskje ikkje heilt den rette storleiken, men eg fekk no eit slags inntrykk av at dette kunne bli bra.

Eg leitte litt i stofflageret og fann fram dei gamle barndomsgardinene mine med marihøner på, eit raudt bomullstoff og babusjkastoffet pluss rosestoffet frå stoff og stil. Deretter sette eg i gang og eg var ferdig klokka halv tolv i går kveld. Kjolane kan brukast på begge sider, og difor applikerte eg på nokre marihøner på marihønekjolen, og tre babusjkadokker på babusjkakjolen.

I dag har eg vore ute i bakgården for å ta bilete av kjolane, og no er planen å gå ut att. For der var det sol og varmt! Ha ein fin dag alle saman!

Merkelappar.. endelig!

Har tenkt lenge på at eg skulle få bestilt meg merkelappar. Har spekulert på kva som skulle vere merkenavnet mitt. Men tilslutt måtte eg berre innsjå at sidan bloggen heiter "eg lagar", og sidan det er eg som lagar tinga, så måtte det verte merkelappar med "eg lagar" på. Var på ei bloggrunde i går og kom over denne oppskrifta på korleis eg kunne lage mine egne merkelappar. Eg sette i gang, fann fram litt flanell som eg hadde liggande, og litt rosa filt. Så brukte eg litt hardplast frå ei gåveeske til å skjære ut malen. Fann litt stoffmaling og ein svamp i syskrinet, og så var det berre å setje igang.. Litt plundrete prosjekt, ikkje like lett å få alle trykka til å verte fine, men alt i alt er eg nøgd. Og det beste er at no har eg malen, så eg kan berre lage fleire når eg treng det! No må eg berre sy litt fleire ting slik at eg får prøvd ut merkelappane!

Sydama 2

Då var den andre skjorta og sydd om.. Eg var så ivrig etter å skjære i stoffet at eg heilt gløymte å ta eit førbilete. Her er i alle høve etterbileta.. Nok eit par med blondegardiner vart med heim frå loppemarknaden, og dei har vorte både til kant nede, og til stropper. Knappestolpen er i ryggen på denne og, men er sydd heilt att sidan eg har brukt strikk for å få grei passform. Fann og to merkelappar i syskrinet som eg har spart på til eit passande høve. Og det meiner eg er no, perfekt til sommartoppane :) På merkelappen står det:

WIFE
I-D-O
35 % Love
35 % Nurture
30 % Devotion
Ring Dry

Har framleis ein del stoff igjen i posen frå loppemarknaden, så det vert vel meir sying tenkjer eg.. Berre vent å sjå!

Oppussing

Det er visst ikkje berre gamle klede som får nytt liv. Bloggen har og fått ei aldri så lita oppussing. Vårgrøne overskrifter, nytt banner og kvit bakgrunn har eg pusla med i kveld. Fungerar det på nettlesarane som de brukar?

Sydama

Eg lovte i forrige innlegg å vise noko meir av det eg fann på loppemarknaden i går. Og her er ei av to skjorter som vart med heim. Skjorta var i storleik XXL, med andre ord perfekt for omsying, for her var det mykje stoff å ta av :) Etter inspirasjon frå denne bloggdama her har eg sydd meg ein sommartopp..


Utgangspunktet.. Klar for oppspretting :)

Det endelige resultatet. Sjølvsagt hengande på perlekleshengeren min som eg fekk med på kjøpet då eg kjøpte pelsboleroen til brudekjolen..

Fann nokre blondegardiner på loppemarknaden som og vart med heim, perfekt for pynting :)

På baksida er knappestolpen frå framsida av skjorta.. Sjekk Nidarosdomen i bakgrunnen :) Bra utsikt frå gangen vår :)

Og til slutt ei blid sydame, som er veldig nøgd med eit kjekt syprosjekt. No ventar neste skjorte. Spennande å sjå korleis den vert :)

Loppefunn

Dagen i dag starta på Dyrebeskyttelsen sin loppemarknad i Trondheim. Det var ikkje berre eg som hadde teke turen dit, så allereie før dei opna var det fullt av folk i gymsalen..
Eg tok strake vegen bort til "tekstil-avdelinga" og der fann eg litt av kvart.. Ein del stoff som skal verte til litt av kvart, lovar å legge ut bilete når eg set i gang og lagar..
Men bonusfunnet var kanskje dette..


Rullar med silkeband i ulike rosa-og lillanyansar.. Og nokre kvite rullar i ulik bredde. For heile hurven, både stoffet og banda betalte eg 50 kr, så eg meiner sjølv at eg har gjort eit kupp! :)

Perfekt for vidare sying og scrapping :)

Brudebuketten

Eg kjem lenger og lenger i arbeidet med bryllaupsalbumen. No har eg fått scrappa bileta av brudebuketten.. I posen ligg det tørka roseblad og strengen som holdt buketten saman.. Buketten var det ei venninne av meg som laga! Eg var kjempenøgd, og syns sjølvsagt at dette er den finaste brudebuketten i verda. Det vart brukt kvite roser, kvite orkidear, hjerteranke pluss nokre andre små kvite blomar. Sjølve stillaset til brudebuketten er laga av vrihassel og buketten kunne bli tredd inn på arma og henge frå den..

Arket som eg har brukt har eg spart på lenge.. Det vart kjøpt spesielt til desse bileta :) LOen er med i ei utfordring frå Nordsalten hobbyklubb som heitte "flower power". Tykkjer det passar ekstra godt med bilete av brudebuketten då.

Prinsesseposar

Eg har ferie og då har eg tid til litt av kvart. Blant anna har eg sydd tre prinsesseposar som eg har fått inspirasjon til her, og så har eg følgt denne instruksjonen.. Det er så kjekt med så mange flinke bloggarar rundt om kring som kan bidra både med instruksjon og inspirasjon!

Posane er sydd av litt restestoff som eg har hatt liggande. Eg tek ikkje sjansen på å kjøpe noko nytt stoff før etter ferien, treng kvar ei krone til USA! Men neste gong vert dei nok laga i ein litt meir sukkersøt variant :)

Kort

Det er sesong for kortlaging, og eg har laga fleire kort i det siste til ulike høve i tida framover.


Dette brettekortet ser slik ut når ein åpnar det, og nedanfor ser du korleis det ser ut når ein lukkar det att.


Dette er ei lommebok, som skal brukast som dåpskort.



Og dette er to after eight-esker som eg har pynta.

Bryllaupsminner

Sidan brura og brudgomen har åpna bryllaupsgåva på forskot, kan eg no legge ut bilete av eska bryllaupsgåva vart pakka inn i :) Den er tenkt til å ha bryllaupsminner i, i etterkant av bryllaupet. Boksa er pyntamed papir frå webster pages, som har kjempeflotte ark, silkeblomar frå nokre gamle lysmansjettar, litt pomponband og nokre gamle boksider.

Bryllupsalbum

Eg har vore kreativ igjen.. Det blåste ein inspirasjonsvind over meg på søndag og eg fekk gjort ferdig fortsettelsen på ein dobbel-LO pluss laga ei ny side..

Første side av vinterland laga eg i november,
så det tok meg altså fem månadar å finne inspirasjon til å lage denne.

Eg har hekla saman bilda, og så er det litt blonder og ein brun krystallswirl..

Her er fra fotograferinga etter kyrkja med hjelp av to gode vener.

Det var faktisk berre så vidt vi hugsa å ta bilete saman med forloverane!
Men dette vart no ganske kult då :)